Daayaan-baayaan-daayaan

Suna tha, samajhdaar ko ishaara hi kaafi hai
Par samajhdaaron ko samjhaate samjhaate,
humne apni hi soojh-boojh kho daali hai.

Aaram se baat karein toh hum napunsak
Ladke baat karein toh hum hinsak
Galiyon mein aawaazein uthayein toh hum berozgaar
Pooch toh lijiye Sir ki desh ki yuvaa berozgaar kyun hain!

Sawaal uthaana school ke shikshakon ne sikhaya toh sahi
Par yeh nahi ki sawaal kaunse poonchein,
Jawaab kisse maangein
Hum toh aap hi ki tarah joojh rahe hain iss duniya se har roz
Aapke hazaaron sawaalon ke vistrit jawaab hamare paas nahi
Kyunki hum aapke shikshak ya lok sevak nahi

Kabhi jaati, toh kabhi dharm se darte hain
Kabhi apni insaniyat mein bhi jhaank-ke dekhiye
Abhi bhi ek bus ke jalne ka maatam manaa rahe hain
Ab khoon se sani laash ko dekh aaye sukoon se bhi darriye

Kisi ne haq diya ya nahi, woh sab adhikaar aapne chheen liye
Asli naagrik kaun hai aur kaun nahi, woh nirnaye aap hi ne le liye?
Toh humne bhi aapko bewakoof samajh ke dinner table pe thoda gyaan diya
Chaliye, humne bhi aapko buddhoo samajh ke maaf kiya.